محمد الحسن سالم (حميد)يا مطر يا نار حبابك

يا مطر يا نار حبابك


هبّ نسّام جيتك ..
ضوّا لحظاتو البكانْ
زين أركانو الزّمانْ
فرهد الشوق المضارع
البلد بقت الشوارع
دافرة من كل المواقع
زي مطور هَتَكتْ سماها
وبدّعت ملت المزارع
لهفة الزول الجا راجع
من نخيجو تقول موادع
الفرح في أعين الصابرين
دموعو
البشاشات التندد بي عوارضو
والتأكد لي رجوعو
والتبدد خوفو .. جوعو
والتجدد ضخّة الدم في عروقو
وبين ضلوعو
تنفض الهم من جموعو ..
ومن خطابِن ..
لافتات أعلام بشابِن
موكب العرسان شموعو ...
الأصابع البي ترابِنْ
الأكف الدم خضابن
لافتات اعلام تهبهب
زي صفق
الاناشيد .. يشتهنِّك
في سَبَقْ
المناديل التلوّح
والطِّرحْ
البنفسج والبراسيم التراقص
في مرح
العصافير الملونة
في مرايات الفضا المتكابي
تالاك قوس قزح
استحمّت غيمة
في بحر الأُفُقْ
كان دعاش الغيمة
بوخة وكانت الرغوة
الشفق
جفّفْ أطرافَه النسيم ..
فرّ بشكيرو الغَسَقْ
ختّ في كف المسا
حنة الزمن القديم
قالت الريح العجوز
ما استحت ..
قالت يجوز
كالصبا ارجع صبية
وأسري بي عطر العروس
أبرى فستانا البياضو ..
نية الطيب حنين
بي ندم صادق أمين
عقّبَتْ قالت ..
وأتوب
ما أغُش الأوكسجين
بالأعاصير العبوس
إلا شان للظُّلم أدوس
آه يا عشمي الحزين
لو ترجِّعني السنين
باركنها نسمتين ..
بَاخَتن بالا الرزين
آجَرَنّها في اللّي راح ..
طيّبن نزف الجراح
وعمّدنها ريح صلاح ..
من طرف شق الصباح
قاطعنها نجمتين ..
يمة عقبالنا ..
ومتين
يوم زفاف الغيمة
وين ..
ونحنا نشرق مرتين
إنتشى العشب الصغيِّر ..
وتاوق القمرة التغيّر
بين ضفاير تمرتين
خفّ يتصنت مزارع ..
دخلة المطر المولَّه
أو زفافو على الشوارع
وحّم القمح اليراهق في المتر
.. جبّد شتولو ..
توّر القش في المراتع
نوّرت كل الخمائل ..
السحر فوق راسو جايل
زي تخاليل الأصابيع ..
بين سبيب محبوبة طالع
ومرة نازل
زي رسائل
بينه بين الجايي راجع ...
لى حصاد العمر شايل
ضوّا في كل النفوس ..
حُبْ
تحت كل الشرائع
والشعائر والطقوس
جمّل العشق ..
المضاجع ...
حتَّى أصوات الضفادع
سنّ حنجرة المغني
بين قلب زولو الحجر ..
العنيد الما مطاوع
ضحّى من أجلو وصبر ..
ضد زمانات التدني
والمناحات التجنّي
سنّ حنجرتو المغني ..
وغنَّى غاية ما انفجر
شاحب الليل بالألق ...
الفَجُر بهَّر جديد
فرحة الدابو انعتق ..
فك قيد جرحو ونتق
لي جواد شوقو انطلق ..
قولب الضُّل والصقايع
الوجود قدامو رائع ..
خالي من صُرمة وفجائع
العصافير التطالع
في كتاب الصبح طالع
الندى في سرابو ناقع ..
والزهر يا دابو فاقع
انطلق للحلة شافع ..
شال بشارة يوم جميل
الفراشات للأصيل ....
والبنفسج للشفق
أملوا عينيكم غميد ..
يا مجاريح لا أرق
ضمّو لي ليلكم شديد ..
ضمّو بي عد ما وسق
ولا تجمّوها السيوف ..
لا ترمّوها الدرق
المطيرة الفي وشيكم ..
هبّ نسّاما وبرق
ماها بي الساهل تجيكم
إلا بالدم .. بالعرق
…. …. ….
…. …. ….
يا مطر يا نار حبابَك ..
خدِّر الغضب المعُوبِس
بلّل التعب التشابَك
روحنا شبّت بالقضية
وتاوقت برقَك سحابَك
أيوة يا مطر الغلابة
المن زمن صابر ترابَك
والقلوب يشرق سرابَه
يا مطر يا جايي دابك .