محمد الحسن حميد ..زعلان منك

زعلان منك أي لأنك
ما هببت قوافل شواقو ولا اكرمت رسايلو الجنك
لا عوافي ولا كيفنك
يجري يلاحق في السُفار العائدين والجايين منك
قبال ياخد خبر البندر شوقو يصبقو ويسأل عنك
يلقى حنينو إندردر ساكت تاري البندر ودر حنك
تاريك ناسي في ليل الغربة حال الناس اليوت طارنك
طاري عيونك لما تستف تمسح دمعة التانية تقطر
نزف وداعك لما شعاعك ساب الحلي ظلامها معكر
فد جوابك طمني عليك صهين تاني أقول مشغول
ابحت ليك العذر براي وأبعت ليك الشوق على طول
فكر أكنك في الطوّالي بيسأل عنك
عبأ رسائل فوقها رسايل ياهو الجاهل كل الجنك
لو كان قايل صدرو الماهل ما بالساهل يسأل منك
ضارب صدرو بي طول صبرو وماك حجر من أيدو يفنك
إنت بشر بى كل ظروفك حر في جودك .. حر في ظنك
ما بتربع يرجى حروفك و لا يشابي على غيم دنك
ما بتضرع عشان ما يشوفك عندو كرامة تبدل حنك