انا اتيقنت من تالاك

انا اتيقنت من تالاك


أنا انيقنت من تالاك
لا آسف ولا محزون
على العمر القضيتو معاك
براي باقي الدرب بمشي
وخطاي تعدم الهدّاي
أكان السكّة حارت بيْ
وأكان كرّت سموم الصيْ
على نسم العشم جوّاي
قوافل صبري ماب تضهب
وأمان حاديها مو الدوباي
خيول قبّال دا ماترّت
ولا فرّت من الحوبات
ولا حرّت
ولا انشدت
ولا صدّت سروجه بلاي
وأعود من دربك الدردار
على شعب اليقان مسنود
وأحرس العرسة من تالاي
وريح شجن الليالي السود
صه .. صه يا الحشا المهرود
وهبِّد غلبك الوقّاد
قبل ما يرقدك هبّود
عشتو معاهو ما هو أجواد
زماني بلاهو يبقى يجود
عيشكن يا قماري عليّ
أنا القطّت تقي دنياي
وعشِّكن أبني بي إيدي
أنا البين الرياح جاي جاي
شرطاً ما تقوقن لي
قوقيي يبهلن عيني
ويوقد في دواخلي أساي
"منو العزَّ الحبيب ما لاك
وقدَّس لي عيونو السود
أكان سوِّيت غناك في عود
كان خدّر ملا ا*****
وكان فوّح عبير وورود
وما كان الزمن طاطا
لا وقع انحزم واقود"
شيشكن يا قميريات
كم من قبلي خاب مسعا
وما شقَّ الجيوب ودعا
علي جور الحبيب بآيات
ولا هتك القلوب ونعا
مزارات القريب بأبيات
ولا نوّح على الراحن
قدر ما ظنَّ في الجايات
مظان الخير وجرحو وِعا
ونظر قدّام مضمِّد سكتو الموجعه
.وكتّر خيرو يا أيام
وكتّر خيرك إنتي معا
ده ما أول صد ولا آخر ود
وكم من صد ودادي رعا
ويا زارع حياتي صدود
عذابي معاك إنّي غمامة
وإنت كركي لا محدود
ونبت البينا كان لابد
يضبلن ما يضبلن كيف
وإنت لقيتو عز الصيف
صهاديب الصعب صالا
نتقت النسمة من تالا
نتفت الغيم خريف وخريف
حبست تسابو تحت القيف
وقطع سرسار جداول الود
وصنّه يباب ودابك جُد
قبيل وين كت ؟
قبيلك كان يكفِّي رزاز
بعد دا إن جيت
أوديك وين
بعد دا إن جيت
وأنا اتيقنت بدري قبيل
بعد فرّجت فيِّ الليل
ونبّاه الدغش في العين
وأنهكت الوداد بالصد
وأشواقي الغبش بالبين
حليلك كنت زولي أنا
وملاذي الفي السمح والشين
تموت آهاتي لما تبق
متل جهر العديل والزين
خطاي فوق دربك الدردار
تشولت من متين ومتين
مورقت البيوت بالود
نورقت الحصاد كان صد
وكان لابُد حليلي تصد
نان تقعد تناجي الطيف
بلا البيدودي في النيران
وما من خلوة لامن ضيف
مي كم من شتلة فوق القيف
بتيبس وكم حراز في الساب
يخدّر يوم بحيرو يصد
أمش يعدل عليك الله
طريقك لا غلب لا آه
ولا نسمع مريكبك تاه
وسط لجة زمن جهجاه
وأنا الزي الشعوب مغلوب
زمان السخرة والملاك
أنا العبِّيت مخاليْ ريد
وقلت لك يا الحبيِّب هاك
أنا القبِّيت لويبي الإلفة
ألقِّم في جدَيْ محياك
أنا الباسمك ببيت محروس
وبي رسمك بقيت مهووس
أنا الصبّيت مطيرة شوق
رويتك دمّي همِّي ألقاك
ومن تعب القميحي الروس
ومن نخل المودة البوص
لقيت شدر الهوى النديان
مجرد عود وناقرو السوس
وما نوحّتَ قُت "يا ملاك
حرام رحماك أنا البهواك"
ولا حنّيت أزورك يوم
أنا الطول الولِف ساساق
جمعت أشلاي ولملم روحي
من بين ريح زمن فرّاق
وقت يا قلبي رغم الغلبِ
لا انكسرت قليلة الوعد
ولا اندفق وفا العشاق
ولا ضاقت رحابة الكون
ولا غمّاً نتح حرّاق
بحب الناس مشيت مسكون
أنا اليي دا وحبايبي يي ديل
وشيلتي أماني شايلة شيل
وفي إيدي عزاي عصا موساي
فيا ضل الغنا المايل دريبي عديل
أرم موزون
على ناساً غبش بالحيل
بتآكل من وشي ا*****
وتشرب من بواقي السيل
وتنطارش جراح الحال
تحت موّال معطّر فأل
يقطّر من عيون أطفال
بتلفح من هجيره ضليل
يجم جوّاها زي شبّال
يرسِّي الخاطر المغبون
يلولي بنسِّي جوع البال
خلا الماعون ..
تفتِّش في القميرة شليل
شليله المافي تربى رجال
وتمرق في الدروب آمال
تعدل الميل ..
وتركز لي رماح الويل
وراء درق العشم في بكرة
يا بكراها شان ماتكون
ويا بكرانا قدر الكون
بعد الخيل ..
وأشد الحيل ..
وأتكِّن فوق تقانت الليل
شعاعات الغنا الميمون