حلمان والحلم جميل

حلمان والحلم جميل
من بكرة عليك يا ولدي
عبِّيت النيل في فتيل
طنبجت عتامير بلدي
على طول المليون ميل
تمسحت الصحراء الكبرى
أهدتني العرب الخيل
كلهاري وكل صحاري
العالم وقلت يا ليل
نصبح على خير على طير
بيغارد ريحة الشيل
نصبح على بسمة حب
على شوف إنساني و شوق
نسمة حنيّة تهب
من تحت القلب وفوق
بجناح الرحمة تخب
قمرية تسوِّي القوق
يا يوسف فِطن الجب
يا يوسف هلاَّ مروق
قمرية جناح جبريل
شايلاله بشارة خير
للناس الشجر الطير
وين تاني بنرجى الغيم
وننتاوق تالا بروق
إلاَّ اللهم عشان يتبرد
جو محروق
يتحمم قلبِ نخيل
في المطرة كما المعشوق
مع ريح العشق يميل
ما فضّل من عطشان
الطين عدم الله شقوق
بيوضة على روشان
مستنِّي نزول النيل
في الخاطر طفلة تكيل
لي عابرة من القنديل
بترشرش في الحيشان
والشارع كلو سبيل
والخيل الصاهلة صهيل
على ضهرها زي سبلوق
مصبوبة كهارب الليل
بتمشّط وبر النوق
بينقِّط حبلِ غسيل
في الحجر السوَّا عروق
الحلفى الطرفي عديل
التشِّق والمعيوق
القائم والمسيوق
الكلو بيشرب نيل
الأيدي الخدرا تشيل
تكشح في الفأل ماروق
وبيوضة تشد الحيل
مفروضة بيرخي السوق
من عزَّتو يأبى يحوق
ما الطيِّب كلُّو قليل
للدنيا تستِّف شوق
ترحل مواويل
مواويل
يا ولدي الحلم جميل
بس كيف يا بلدي تروق
الحال الزلَّة أصيل
والفأل الطلَّ شروق
الماسك دربو عديل
يا ولاَّ ولا المسيوق
نفس التحت ألمي طويل
شن ضيقك وإنت الفوق
لو ريقك بلَّه النيل
ما تعطش إلاَ الشوق