دوبيت بعنوان ( أسمع نحن )

أسمع نحن
نـــحن نـــفوســـنا لــكل الــمحــامــد لامّة
ويــوم ســواهــا ربى اداهــا اجـود خـامة
نـحن الـماب نـهاب الـحارة نخشى لِطامة
نــحن نــزولـنا فـوق اعـدانـا زى الـطامة

نــحن الــعازة نــبقــالة الــدرق نــحمـيهـا
نــصقــع بـالـسلاح قُورة الـعدو ونـدمـيهـا
نـقطـع راس ونـجدع إيـد نـعوم فى دمـيها
عِزة عـازة مـا بـنرضى الـدخـيل يـرميها

نــحن مــساعــد الــمك نــحن ود حــبوبة
والـباشـا صـبح رمـاد حـرقـنا فى راكوبة
نــحن خــيم كـرم سـنة الـمحـل مـنصـوبة
ونـحن حِمـم لـهيـب فوق الدخيل مصبوبة

نــحن ســيوفــنا هـزمـت لـلسلاح الـنارى
ونـحن كلامـنا دغرى عديل ومو متوارى
نـحن عـطانـا فوق الناس بروق وسوارى
ومـن روس الـخصوم شافعنا بملى لوارى

نـحن غُبـش بـخات فى إيـدا قابضة اللوح
مِتــقبة نــارا غــير لــلبــارى مــا بـتنـوح
نـحن بـنعـشق الـموت يـوم عطورو تفوح
ونـحن بـخيـلنـا يـديـك مالو جت والروح

نـحن صـبيـنا مـا بـحلـحل صُرر جـاراتو
ومـا بـشوف الضعيف وإتباهى بى فاراتو
مــعروف الــكرم لابــسيـن دوام شـاراتـو
وعـادى بـنفـقش الـفارس الـغلـيدة سـراتو

نـحن أرضـنا خـضرة ومـاها جدبة يبيس
ونـحن بـنصـرف الضيم عنوة مو تحنيس
نـحن وسـطنـا مـا بـنقـبل عـميل وخسيس
ويـوم الـحارة مـا بـنضـارى فى الـبوليس

نـحن الـماب نهاب من السلاح يوم ضخو
نـعشـق صـوتـو نـطرب بى مُسـيقة سـخو
بــنواجــه خـصمـنا ونـرمى بـب فى فـخو
والــظالــم الـعبـاد فِد صـفقة نـشرط مـخو

نـــحن ورانــا آية ومى ســماح والــسارة
لابسات عِفة توب وبيوتنا حافظة اسرارة
واثـقات مـننـا وعـارفـات قـلوبـنا جـسارة
إن تــريــنا صـاديـن يـبقى لـوم وخـسارة

نـحن عـقولـنا مـن الـحِكـمة ماخدة نصابة
نــحن نــحلـحل الـحوبـات نـفك لـصعـابة
نـحن صـغيـرنا يوم العركة لاوى عِصابة
نـحن صـبرنـا مـا بـماثـلوهـو إلا صـحابة

نــحن ضـربـنا بـهدل نـاس قـلوبـا سـميـنا
نــحن الــفى الــوجــود والله قــلة ســميـنا
نــحن وطـنا فى كـنفـو الـعزيـز ضـامـينـا
ونـحن بـنسـتر الـسمـحات نـجود بـدمـينـا

عــندنــا ريــف جـمالـو يـحيّرك وصـيفـو
عـندنـا نـيل بـشارة خـير مـكاضـض قيفو
عـندنـا صـيد نـفور مـن الـصعـب تـوليفو
شــوفـتو بـتسـعد الـمحـزون تـتمـلو كـيفـو

عــثمــان فى الــشرق قـاد الـبواسـل وقـام
وفى قـــــلعة ســـــواكــــن دمّر الــــظُلام
ود عــبد الــطيــف والــماظ بــطولة تـمام
ونـحن الـفى جـوارنـا حـقوقـو مـا بتنضام

نــحن فِعــالـنا تـغنـيك عـن حـديـث وكلام
ويــكفــيك هــكس.غـردون قـائد الإجـرام
يـــوم الـــعركة نِســـتبــشر نــقيــف قِــدام
ونـــحن نـــسبــنا تــقوى والــقبــيلة إسلام