مسدار الصفية للشاعرحسن التوم

قومتو خفيفة من ميسو خاتي العترة
و نيتو الراحة عند البي العروض منسترة
يا من ليهو جانب و شيخي سامع النطرة
من العاقة و العطلات حواك أبو شتره

******
قبة طلحة و الكمر الجنيتو سكارى
حالا وخرو أب دومتاً نبع قطارة
اتغنلي و وسع رأيو و عملو فجارة
خف يطفر بي لفحة توبي منو بصارة

******
شافع العاصي و النور الظهر في بارا
تجمعلو شملي بي المي متقززة و كوبارة
الخلانا أنا و إياك تملي سهارى
نشيق حتة الحضري الجبابره تجارة

******
تريسات المشاتيح الكتيوي عقبهن
خف عمراتو بالمطروح و شد طربهن
شيو ستات مرادي الأصلو صافي نسبهن
إنت مذهللك و أنا تب طباعي خربهن

*******
قبض السكة جافل لافخ أم مرجوم
تقول شاربلو انشا و فارع المتموم
مبيتنا الليلة عن ست الحشا المبروم
أنظر فيها و أبصاري الساهرة تنوم

*******
أداهن شمالو حفايراب فكرون
قال مرواحنا تيلاد اللحو مضمون
يتحقق انسنا الليلة يا ب شنشون
مع حاكم الدول و الجوهر المكنون

******
أيد أبو ميكح الأعول المهندس بارا
قطعها وقفي غير سوقا كتير و كشاره
تيلاد ماصع الصيف الجنيتو بطارى
كان ما تانسو نمي وكض علوقي خسارة

******
من دعت المطيمر كش و صر سماعتو
عارف الليلة عن ناقي الطبائع راحتو
خف يا ب شترة خاف فور العلوق و قطاعتو
واغل بي السحي الماشف نظيرها سماحتو

******

جا باري الطريق من المطيمر وقفي
داير فيك يا النقاز سراعة و خفة
شيوم الفيهن الصحة مني تلفها
منو خاشش و في النهار بتدفى

*******
قطع بي الهواد و حش الضهيرة الفاز
نشفان عرق غير محجمو النزاز
تيلاد ماصع الصيف السموح و عزاز
نيتي الأنس معاهن بدري يا النقاز

*******
أيديك خفهن قبل الشمس ما تطيح
محاجمك خسرن عاج الرسن بالقيح
يقن و سوي (فورفورت) النصارى صحيح
أتواقد متل نار الغباش في الريح

*******
عقب النالة و الجبل المباني حجارو
طري فور العلوق عند اللكني قمارو
القابض مزمات قلبي بي دردارو
لسع غادي يا النقاز و أمسى نهارو

********
اتجمع بعد ما شاف ودي أتبره
زاع بي تنيتو هاش و استعزى قطع الوبره
شيوم الليهو تشريفات بفرضو الحبره
فرمت جوفي بالهاري السنين مو طبره

*******
قفاك جمامو فوق عاج المفقر بشي
كفك غايسة الأرض القديمه نفشها
تيلاد ماصع الصيف السراري كفشها
نيتي الليلة في كزيم براطمو أتعشى

*******

داك وادي الكتر يا أب تقزة تاوت دحك
بعيد الليلة توتال العليهن لحك
كان ما تسخى ها الليلة و تكمل صحك
أديك أي واحد أقول رصو مرحك

********
ما أحسبك تدور لي الذل و تكسب كدري
كنت تبيعني لي أهل المراحيك بدري
الصي المفاسح فيهو واسع صدري
كم لله هاجم بيك عظيم القدر

********
وخر ود بشارة و الودي مسعود
طري ست ريدي و كمل المجهود
إنت كاتلاك شيوم ست الصبا المعنود
و أنا جنتي كريم البراطم السود

********
هدهد في الدحيح تدري المصنة النادر
قنب يحاكي في الجامن رواينو مبادر
برد و سوى رش قمري المتله السادر
من العين محوي الجليل عبد القادر

********

هادي الخاسة جاتك يا معرص جارة
واقل الفقدو قرشني الحناضل الماره
مدادات الدوايات من محاجمك خارة
لي شوف ملكة الدول أم عساكراً فاره

********

طلع الشيخ نعيم طربن مسارعك و فارن
شيشك برد الهوى منو عيني طارن
الخلاك جمامات قفاك بتجارن
اللهطه و مواقله الضميرو ممارن

********
اتجمع بعد ما سو ورا أبو سعيفة
غايد و قصر السكة الوطاطا نضيفه
يا شيخ طرقي و الواجبلو كلو قطيفة
فوقك يا أي حركة غير سواقة خفيفه

********

داك حجار عطا أبيار الدريشاب شافه
فوقك جار أبو و أسياد محبتي كافة
اللحماها ما يروح من عضامي نشافها
نوناي المليليك أب عساكرن صافة

*******
ساهو صعيدو دكان المربعن وعدو
ناطح الأصفى من ضو الكهارب خدو
توتال السحي الوقف الشباب عن حدو
داك إياهو هاك رسنك ضراعك سدو